عجوز عنده 17 سنة

من طرف **عبدالرحيم** الإثنين مارس 24, 2008 4:04 am

عجوز عنده 17 سنة

يطلق على الست الكبيرة قوى والشيخ المسن..لقب "عجوز"
والكلمة مأخوزة من "العجز"

العجز عن الحركة الطبيعية
العجز عن مضغ الطعام
العجز عن التفكير السليم
وقالوا فى الامثال "مكبرنا زى مصغرنا"

المخيف ان تبقى شاب تحت العشرين وعندك شعور بالعجز
ليه..وأنت جسمك رياضى وسنانك حديد وعقلك مليان بحث وفكر وصحافة الكترونية؟

السبب له اكثر من احتمال:
*التنشين -: على هدف محدد...وهو يا لأ؟!!
يا "طب"... يا بلاش جامعة
يا البنت ملكة جمال المنطقة...يا مفيش حب وجوزاز

**المقارنة :- تبقى جايب85% وقدامك اكتر من كلية والمستقبل كله بإيد الله وعسى ان تكرهو شيئا وهو خير لكم... لكن المشكلة فى ابن الجيران جايب 93%...أما اختنا طالبة الثانوى فتبقى سمراء شربات شعرها بنى وأسلوبها جميل...لكن المشكلة فى بنت خالتها البيضاء الطويلة.

***الوهم:- بان كل شئ ثابت ومتجمد مع ان الحياة مش "فريزر"
انا لو كنت فقير حاليا مش هفضل كده على طول ولو زميلى ابوه مليونير
مش شرط يطلع هو مليونير...المشكلة وقتية..قارن الحاضر بالمستقبل
وتوقع التغير فالتغير من سنن الحياة البشرية...وكم من الاسر المعدمة اولادها طلعو حاجاة تانية.

****الدنيا وبس:- بمعنى عدم التطلع للجنة وجمالها ونعيمها...والله الجنة فيها حب وسعادة وشجر وبحر ورحلات وكل شئ اتحرمت منه فى دنياك
"وهم فيما اشتهت انفسهم خالدون"...سورة الانبياء
فكر بجدية فى هذه النقاط
تتخلص من العجز والشعور بالاحباط